Երեք բուժառու հիմա գտնվում է Երևանի ԲԿ-ներում. մեկը վիրահատվել է, երկուսը պոլիտրավմաներով կոնսերվատիվ բուժման ընթացքում են, հետազոտությունների, և մնացած բուժառուները գտնվում են Ճամբարակի ԲԿ-ում, ստանում են համապատասխան բուժօգնություն: Ճամբարակում գտնվող հիվանդների վիճակը միջին ծանրության է: Այդ մասին լրագրողներին ասաց առողջապահության նախարար Անահիտ Ավանեսյանը:
«Ըստ էության մեր բժիշկները՝ Երևանի և այնտեղի, անընդհատ կապի մեջ են, և գնահատման արդյունքում կտեսնենք՝ հավելյալ տեղափոխումներ կունենանք, թե՞ կկազմակերպվի բուժօգնությունը հենց տեղում»,- ասաց նախարարը:
Ավելի վաղ հայտնել էինք, որ Ճամբարակ քաղաքի Գարեգին Նժդեհի փողոցի շենքերից մեկի բնակարաններից մեկում պայթյունի հետևանքով հրդեհ է բռնկվել։
Ըստ նախնական տվյալների՝ փլուզվել են 4-րդ, 3-րդ և 2-րդ հարկի բնակարանները։ Մասամբ փլուզվել են կից մուտքի բնակարաններ, կան հոսպիտալացվածներ և 4 զոհ:
Նշենք նաև, որ Ճամբարակի պայթյունի գործով ՔԿ-ն նախաձեռնել է քրեական վարույթ:
