ՀՀ կառավարության շենքի դիմաց բողոքի ակցիա են անում 2025 թվականի ամռանը բանակ զորակոչված տղաների ծնողները։ Նրանք պահանջում են, որ պարտադիր զինվորական ծառայությունը 1.5 տարի (18 ամիս) դարձնելու որոշումը տարածվի նաև իրենց որդիների վրա։
Նշենք, որ 2025 թվականի դեկտեմբերին Ազգային ժողովն ընդունեց «Զինվորական ծառայության և զինծառայողի կարգավիճակի մասին» օրենքում փոփոխություն կատարելու նախագիծը, որով ՀՀ-ում պարտադիր զինվորական ծառայության ժամկետը 2026 թվականի հունվարից 24 ամսվա փոխարեն դարձավ 18 ամիս։
«Նույն թվականին ծնված երեխաները, որոնք անգամ դասարանցիներ են, տարբեր ժամկետներով են ծառայում. մեկը ծառայում է 2 տարի, մյուսը՝ 1.5։ Մենք նամակներ ու դիմումներ ենք գրել, սակայն բոլորս ստացել ենք նույն պատասխանը՝ օրենքը հետադարձ ուժ չունի»,- լրագրողների հետ զրույցում ասաց ծնողներից Գայանե Սարգսյանը։
«Հասակակիցներ են, դասարանցիներ են ու մերոնցից ավելի ուշ են գնում բանակ, բայց ավելի շուտ են վերադառնում։ Մեր պահանջն է օրենքը գրողներին, որ հավասար պայմաններ լինեն, և փոփոխությունն ազդի նաև 2025 թվականի ամառային զորակոչի վրա։ Կա՛մ կարող են հետադարձ ուժ տալ, կա՛մ արձակուրդներն ավելացնեն, որպեսզի պայմանները մի փոքր հավասարվեն»,- ասացին ծնողները։
Հավաքվածների խոսքով՝ իրենց որդիները ծառայությունից չեն բողոքում, սակայն վստահ են, որ նման անհավասար պայմանները հոգեբանական խնդիրներ են առաջացնելու տղաների մոտ, երբ տեսնեն, թե ինչպես են իրենցից ուշ զորակոչված հասակակիցներն արդեն զորացրվում։
@ArmeniaSputnik
