Ուսանող-գործատու կապն ավելի մոտ. արդեն 5 տարի է՝ բիզնես խնդիրների լուծման CaseKey մրցույթը յուրահատուկ ձևաչափ է առաջարկում, որի մասնակիցներն աշխատում են իրական բիզնես խնդիրների վրա, ներկայացնում են ռազմավարական լուծումներ ու հաստատում օգտակար ծանոթություններ տարբեր ոլորտների առաջնորդների հետ։
Կրթությունը և գիտելիքը երկրի տնտեսության հիմքը համարելով՝ Զանգեզուրի պղնձամոլիբդենային կոմբինատը (ԶՊՄԿ) ևս միացել է այս կարևոր նախաձեռնությանը՝ նպատակ ունենալով նպաստել կրթության որակի բարձրացմանը:
«Արմենպրես»-ի հետ զրույցում CaseKey նախագծի համահիմնադիր Արշակ Կարապետյանը նշեց, որ մինչ այժմ ունեցել են 7000-ից ավելի դիմորդ և մոտ 900 մասնակից շրջանավարտ։
«Գործընթացը մեզ մոտ տևում է մոտավորապես 9 ամիս։ Այս տարի արդեն 3-րդ միջանկյալ բիզնես խնդիրն ենք առաջադրում, որը նվիրված է «Յանդեքս Արմենիա»-ին։ Նախորդիվ մենք ունեցել ենք հենց մեր՝ CaseKey բիզնես խնդիրը և Առնո Բաբաջանյանի համերգասրահի վերաբերյալ բիզնես խնդիրը։ Երիտասարդները ստանում են խնդիրը, սահմանափակ ժամանակում պատրաստում են իրենց լուծումները և ներկայացնում են հենց բիզնեսների կամ ընկերությունների մենեջմենթին կամ սեփականատերերին»,- ասաց Արշակ Կարապետյանը:
Նա նշեց՝ եզրափակիչ փուլ են անցնում այն թիմերը, որոնք կիսաեզրափակիչ փուլում տարբեր մասնագետների կողմից ստանում են դրական կարծիքներ, իսկ եզրափակչում արդեն կորոշվի լավագույն թիմը:
ԶՊՄԿ-ի գլխավոր տնօրենի տեղակալ Վարդան Ջհանյանն «Արմենպրես»-ի հետ զրույցում նշեց, որ համագործակցում են բուհերի և CaseKey նախագծի նման նախաձեռնությունների հետ, որպեսզի Հայաստանում կրթության որակը դառնա համաշխարհային պահանջներին համապատասխան:
«Հենց այս երիտասարդներն են մտնելու աշխատաշուկա, դառնալու տնտեսության հիմքը, այդ թվում՝ աշխատելով նաև մեր կազմակերպությունում: Ցանկացած տնտեսական աճ, զարգացում կատարվում է, երբ աշխատակիցների մոտ կա ստեղծագործ մտածելակերպ: Չնայած նրան, որ շատերը ստեղծագործ մտածելակերպը ավելի շատ մշակույթի, արվեստի հետ են կապում՝ իրականում բիզնեսը և տնտեսությունը նույնպես պահանջում են ստեղծագործ մտածելակերպ»,- ասաց Ջհանյանը:
Զանգեզուրի պղնձամոլիբդենային կոմբինատն իր սոցիալական փաթեթից ամենամեծ մասնաբաժինն ուղղում է հենց կրթության ոլորտին՝ կոմբինատում աշխատող ուսանողներին, աշխատողների ուսանող երեխաներին տրամադրելով ուսման վճարները։ Համագործակցում են նաև Հայաստանի տարբեր բուհերի հետ՝ իրականացնելով մի շարք մեծ նախագծեր:
Մրցույթին մասնակցող ուսանողների խոսքով՝ սա շատ լավ հնարավորություն է՝ լրացնելու բուհերում առկա պրակտիկայի բացը։ Նրանք սա նաև աշխատաշուկա մուտք գործելու հիանալի ճանապարհ են համարում։
