Միջազգային ատոմային էներգիայի գործակալությունը (ՄԱԳԱՏԷ) հայտարարել է, որ Իսրայելի և ԱՄՆ-ի կողմից Իրանի միջուկային օբյեկտներին հասցված հարվածներից հետո չի արձանագրվել որևէ ճառագայթային ազդեցություն Իրանի հարևան երկրների վրա։
«Հիմնվելով առկա տվյալների վրա՝ ՄԱԳԱՏԷ-ն կարող է վստահաբար նշել, որ հարվածների արդյունքում ճառագայթման ազդեցություն չի գրանցվել բնակչության կամ շրջակա միջավայրի վրա։ Կարևոր է, որ Իրանի հետազոտական և էներգետիկ ռեակտորները չեն դարձել հարվածների թիրախ», – նշված է ՄԱԳԱՏԷ-ի պաշտոնական հաղորդագրությունում։
Հունիսի 13-ին Իսրայելն անակնկալ հարվածներ հասցրեց Իրանի մի շարք օբյեկտների, ինչը Իսրայելի պաշտոնյաները պատճառաբանում էին նրանով, որ, ըստ իրենց, կանխում էին Իրանի կողմից միջուկային զենք ստեղծելու «մոտալուտ սպառնալիքը»։ Ի պատասխան Իրանն էլ սկսեց Իսրայելին հարվածել:
Հունիսի 22-ի գիշերը Միացյալ Նահանգները հարվածել է Իրանի Նաթանզի, Ֆորդոյի և Սպահանի միջուկային օբյեկտներին՝ ուղղակիորեն ներգրավվելով Իսրայելի և Իրանի միջև հունիսի 13-ից սկսված հակամարտությանը։
Հունիսի 24-ին Իրանն ու Իսրայելը դադարեցրել են հարձակումները:
