Պենդերեցկու անվան ժամանակակից երաժշտության փառատոնի շրջանակներում երևանյան ունկնդրին են ներկայացվում մեր օրերում աշխարհի տարբեր ծայրերում ստեղծագործող ժամանակակից կոմպոզիտորների ստեղծագործությունները‚ դրանցից շատերը Հայաստանում հնչում են առաջին անգամ։
Հայաստանի պետական սիմֆոնիկ նվագախումբը ներկայացնում է Պենդերեցկու անվան ժամանակակից երաժշտության 4-րդ փառատոնը։
2019թ․ ստեղծված «Ժամանակակից դասականներ» կոմպոզիտորական փառատոնը 2022 թվականից կրում է լեհ լեգենդար կոմպոզիտոր և դիրիժոր Քշիշտոֆ Պենդերեցկու անունը։ Պենդերեցկին գրեթե 60-ամյա գործունեության ընթացքում հեղինակել է ավելի քան 100 գործիքային ստեղծագործություն, ավելի քան 120 երաժշտական գործ անիմացիոն ֆիլմերի, տիկնիկային, դրամատիկական, հեռուստատեսային թատրոնների, ինչպես նաև գեղարվեստական և վավերագրական ֆիլմերի համար:
Ապրիլի 4-ին փառատոնի բացման համերգն ամբողջովին նվիրված է Պենդերեցկու արվեստին. ծրագրում կհնչեն կոմպոզիտորի «Մետամորֆոզներ» թիվ 2 ջութակի կոնցերտն ու «Կորեական» թիվ 5 սիմֆոնիան։
Փառատոնի շրջանակում ապրիլի 4-18-ը կունկնդրենք նաև Լուդովիկո Էյնաուդիի, Բեհզադ Ռանջբարանի, Ալեքսանդր Ռոզենբլատի, Պատրիշա Մորհեդի, Սերգեյ Սլոնիմսկու և Սըր Կառլ Ջենքինսի ստեղծագործությունները։
Երեք սիմֆոնիկ համերգների ընթացքում Հայաստանի պետական սիմֆոնիկ նվագախմբի հետ հանդես կգան ջութակահար Ջու-Յոնգ Բեքը‚ ֆլեյտահար Ալեքսանդր Հասկինը‚ բաս կիթառահար Անտոն Դավիդյանցը‚ դաշնակահար Ջուլիա Զիլբերքուիթը։ Համերգները կղեկավարեն դիրիժորներ Սերգեյ Սմբատյանը և Նատալի Մյուրեյ Բիլը։
Պենդերեցկու անվան ժամանակակից երաժշտության փառատոնի շրջանակներում երևանյան ունկնդրին են ներկայացվում մեր օրերում աշխարհի տարբեր ծայրերում ստեղծագործող ժամանակակից կոմպոզիտորների ստեղծագործությունները‚ դրանցից շատերը Հայաստանում հնչում են առաջին անգամ։
