Համաշխարհային շուկաներում թանկարժեք մետաղների գներն այսօր կտրուկ աճել են։ Ոսկու գինը մեկ օրում աճել է ավելի քան 1.5%-ով, իսկ արծաթը թանկացել է գրեթե 5%-ով։ Շուկայի այս ակտիվ շարժը կապված է աշխարհաքաղաքական զարգացումների և արժութային փոփոխությունների հետ։
Միջազգային բորսաներում մեկ ունցիա ոսկու գինը հասել է մոտ 5180 դոլարի։ Ներդրողները սկսել են արագ վերադասավորել իրենց ներդրումային պորտֆելները այն բանից հետո, երբ ԱՄՆ նախագահ Դոնալդ Թրամփը հայտարարել է, որ Մերձավոր Արևելքում ընթացող պատերազմը կարող է շուտով ավարտվել։
Թրամփի այս հայտարարությունը զգալիորեն ցնցել է համաշխարհային շուկաները։ Նավթի գինը նվազել է ավելի քան 10 տոկոսով, ԱՄՆ դոլարը նվազել է։ Դոլարի նվազումը ևս նպաստել է ոսկու պահանջարկի աճին։
Շուկաներում լարվածությունը մեծապես կապված է նաև Հորմուզի նեղուցի շուրջ իրավիճակի հետ։ Այն աշխարհի կարևորագույն նավթային տրանսպորտային ուղիներից է, որով տեղափոխվում է համաշխարհային նավթի մատակարարումների գրեթե մեկ հինգերորդը։ Այդ տարածաշրջանում ցանկացած լարվածության նվազման ազդակ անմիջապես փոխում է համաշխարհային ռիսկերի գնահատականը։
