Գերության մեջ գտնվող մեր հայրենակիցների հարցի վերաբերյալ պատասխան ունենք․ ՀՀ վարչապետ

Գերության մեջ գտնվող մեր հայրենակիցների հարցի վերաբերյալ պատասխան ունենք։ Այս մասին նոյեմբերի 12-ին լրագրողների հետ զրույցում հայտարարել է Հայաստանի վարչապետ Նիկոլ Փաշինյանը։

Նա վստահեցրել է, որ իշխանությունները ամեն օր աշխատում են այս ուղղությամբ։ Նա կարծում է, որ որքան բարենպաստ լինի Հայաստանի և Ադրբեջանի միջև միջավայրը, այնքան ավելի հեշտ կլինի լուծել այս խնդիրը։

Փաշինյանը հավելել է, որ խաղաղությունը կլուծի բոլոր մյուս հարցերը, շատ-շատ հարցեր։ «Եթե կա տեսակետ, որ պետք է էդ խնդիրը լուծվի, որ խաղաղության հարցը լուծվի։ Ես էլ ասում եմ, որ ինչքան բարենպաստ լինի Հայաստանի և Ադրբեջանի միջև միջավայրը, այդքան ավելի հեշտ կլուծվի այդ հարցը։ Դիտանկյան խնդիր է։ Դա բացարձակ չի։ Դա կենդանի պրոցես է։ Եթե մենք առաջնորդվեինք վերը նկարագրված տրամաբանությամբ, չէինք հասնի խաղաղության ներկա կետին։ Մենք փորձում ենք հնարավորինս ճկուն մոտեցումներ դրսևորել, էնպիսի ճկուն մոտեցումներ, որոնք այս պահին մաքսիմալ համապատասխանում են Հայաստանի պետական շահերին», – ընդգծել է նա։

Նիկոլ Փաշինյանը կրկնեց, որ Ադրբեջանի նախագահ Իլհամ Ալիևը պնդել է, որ Սևանը ցարական Ռուսաստանի քարտեզների վրա չի անվանվել, այլ ուրիշ անուն է ունեցել։ «Բայց ես ասում եմ, որ նույն քարտեզների վրա Հայաստանը կա, իսկ Ադրբեջան չկա։ Դա ինչ է նշանակում», – եզրափակել է նա։