Հայաստանի կառավարությունը մտադիր է քննարկել սահմանամերձ բնակավայրերում անհատական տների կառուցման ամբողջական սուբսիդավորման ծրագրի վերսկսման հնարավորությունը։ Այս մասին հոկտեմբերի 30-ին Ազգային ժողովի մշտական հանձնաժողովների համատեղ նիստում՝ 2026 թվականի պետական բյուջեի նախագծի քննարկման ժամանակ, հայտարարել է աշխատանքի և սոցիալական հարցերի նախարար Արսեն Թորոսյանը։
Ավելի վաղ ծրագրի շրջանակներում պետությունը սահմանամերձ գյուղերի բնակիչներին հատկացնում էր մինչև 16 մլն դրամ։ Միջոցները պետք է ուղղվեին բացառապես բնակարանի կառուցմանը։ Սակայն 2024 թվականին ծրագիրը կասեցվել է՝ հայտերի մեծ քանակի պատճառով։ Այն շարունակել է գործել միայն Հայաստանի Տավուշի մարզի չորս գյուղերում՝ Բաղանիսում, Բերքաբերում, Կիրանցում և Ոսկեպարում։ Այստեղ սուբսիդիաների չափը հասցվել է մինչև 21 մլն դրամի։ Ճիշտ է, այս միջոցները կարելի է ստանալ միայն այն պայմանով, երբ դիմողը բնակվում է այդ գյուղերից որևէ մեկում առնվազն մեկ տարի։
Նախարարության տվյալներով՝ ծրագրին, ընդհանուր առմամբ, մասնակցել է 2300 ընտանիք, որոնցից գրեթե բոլորն արդեն սկսել են շինարարությունը։ Ընդ որում, 163 ընտանիք արդեն ամբողջությամբ ավարտել է աշխատանքները։ Ամենաշատ տները կառուցվում են Տավուշի մարզում (1515)։ Այնուհետև հաջորդում են Վայոց Ձորը (306), Արարատը (145) և Գեղարքունիքը (108)։
«Մենք ցանկանում ենք վերսկսել ծրագիրը և այժմ քննարկում ենք պայմանները։ Շուտով կհայտարարենք մանրամասները», – ասել է Թորոսյանը։
Գերատեսչության ղեկավարը նշել է, որ նոր հայտերը քննարկելիս հաշվի կառնվի սահմանամերձ գյուղերի բնակեցման հավասարաչափությունը։ Բանն այն է, որ դրանցից մի քանիսում շինարարությունն իրականացվում է զգալիորեն ավելի ակտիվ, քան մյուսներում։
Բացի այդ, մոտ 500 ընտանիք, որոնք չէին հասցրել դիմումներ ներկայացնել, դիմել են օգնություն տրամադրելու խնդրանքով։
«Նրանք արդեն ձեռք են բերել հողամասեր և ստացել շինարարության թույլտվություններ», – բացատրել է կառավարության ներկայացուցիչը։
